Rolda, atopa a resposta: Xogando coas linguas

 O alumnado dos tres primeiros cursos de Educación Primaria presenta o proxecto “Rolda, Atopa Resposta”, unha proposta na que investigaron palabras e expresións, establecendo relacións entre as linguas cooficiais.

A través desta experiencia, descubriron conexións sorprendentes entre as linguas, enriquecendo o seu coñecemento dun xeito lúdico e creativo, ao tempo que desenvolveron a súa curiosidade polo mundo que os rodea.

Como peche do proxecto, elaboraron un expositor único no que amosan todo o traballo realizado, reflexo do seu esforzo, aprendizaxe e ilusión.

Parabéns a todo o alumnado polo seu entusiasmo e pola calidade do traballo presentado! 

Galería Musical

 No marco da materia de música, cada curso de primaria emprendeu unha pequena viaxe no tempo para coñecer a un gran compositor clásico. Non só escoitaron a súa música, senón que tamén lle puxeron rostro: investigaron a súa vida, imaxinaron a súa personalidade e plasmaron todo iso en retratos cheos de cor e creatividade.

O resultado foi unha auténtica “galería musical” no centro, onde cada obra visual ía acompañada da súa propia banda sonora. Para completalo, o alumnado creou unha lista de Spotify coas pezas máis representativas de cada compositor, convertendo a aprendizaxe nunha experiencia que se pode ver… e tamén escoitar.

Unha actividade que uniu arte, historia e emoción, demostrando que a música clásica segue moi viva cando se descobre con curiosidade e entusiasmo.

Entre páxinas e emocións

Entre páxinas e emocións é unha proposta desenvolvida no marco do XVIII Festival do Libro co obxectivo de achegar o alumnado ao coñecemento, comprensión e expresión das emocións. Para iso, combínanse a lectura, a reflexión compartida e a creación artística, dando lugar a unha experiencia educativa rica e significativa.

O proxecto foi impulsado polo Departamento de Orientación, a mestra de Pedagoxía Terapéutica (PT)da aula de Unidade de Educación Especial (UEE) e o profesor de EPVA de 3º da ESO, integrándose nesta materia como unha proposta de infusión curricular. Deste xeito, a educación emocional incorpórase de maneira natural ao traballo na aula.

A iniciativa estruturouse en tres fases. Nun primeiro momento, realizouse unha reflexión inicial a través da rutina “Conversa en papel”, que permitiu explorar ideas previas e abrir un espazo de diálogo. A continuación, desenvolveuse unha fase de investigación cooperativa sobre as emocións, empregando distintas fontes como bibliografía, recursos web e as tarxetas de Samma Sati. Finalmente, o proceso culminou cunha proposta de creación artística: a elaboración de láminas inspiradas na obra de Anna Llenas.

En conxunto, esta experiencia permitiu integrar literatura, arte e educación emocional nunha proposta inclusiva, sensible e profundamente enriquecedora para o alumnado.

Obradoiro de Calambur

O alumnado de 3º da ESO participou recentemente nun divertido Obradoiro de Calambur, unha actividade na que xogamos coa lingua 🗣️, descubrimos dobres significados 🔍 e deixamos voar a creatividade.

 A través dos xogos de palabras, comprobamos que:
• a lingua pode sorprendernos 
• podemos expresarnos de formas moi diferentes 💡
• e tamén… pasalo ben aprendendo! 

👏 Parabéns ao alumnado polo seu traballo e pola súa imaxinación 💭🌟

📖 Seguimos perdéndonos nos libros… para atoparnos lendo ❤️

La Historia Interminable

Queremos compartir convosco o resultado dun fermoso proxecto no que o alumnado de 5.º e 6.º de Educación Primaria estivo traballando durante as últimas semanas.

Como podedes ver nas imaxes, o noso gran mural do Día do Libro rende homenaxe a unha historia que nos conquistou desde o primeiro momento: A historia interminable.

A través deste mural, quixemos plasmar a esencia da viaxe de Bastian e Atreyu, recreando as paisaxes e os personaxes que fomos descubrindo ao longo do camiño. Cada detalle reflicte o traballo, a creatividade e a ilusión do alumnado, que soubo mergullarse nesta aventura única.

Encántanos ver como fixeron súa esta historia tan especial. Convidámosvos a deterdesvos en cada recuncho do mural e a gozar do resultado dun traballo feito con moito agarimo e cheo de todas esas aventuras que vivimos entre páxinas.

 

Contacontos con Oti

 Esta mañá tivo lugar unha fermosa sesión de contacontos dirixida ao alumnado de Educación Infantil, a cargo de Oti, unha persoa xa moi querida no noso colexio.

A actividade foi fantástica e moi divertida, chea de imaxinación, risas e momentos que fixeron voar a creatividade dos máis pequenos. Oti conseguiu captar a súa atención desde o primeiro momento, creando unha atmosfera máxica na que as historias cobraron vida.

Queremos agradecerlle de corazón a Oti esta sesión tan especial, que sen dúbida quedará no recordo do noso alumnado.